قالولي عندي جنحة
لما رحت أستلم الباسبور يوم الأربعاء ألي فات لقيت أمين شرطة بيقولي "أنت بتطلع باسبور ليه وأنت عندك بسبور تاني من سنة 2005 جوازات مصر الجديدة" وكانت موجه صباعة كأنه بيوجهلي أتهام، طبعاً أنا بكل بساطة قولتلو "طيب لو عندك باسبور تاني ليه طلعلي عليه 
".
المهم بعد ما رحت جوازات مصر الجديدة أشوف أيه الموضوع قالولي هنا "أرجع على جوازات الأميرية أسألهم على رقم الجواز القديم وتعلالي"، رحت الأميرية فقالي أمين شرطة هناك "روح مجمع التحرير قدم طلب أنا مأدرش أديك بيان زي كده" !!!
طبعاً البيان ألي هو بيقول عليه ده هو عبارة عن رقم الجواز الي هما بيقولو بتاعي !! ميأدرش يديهوني !! أمال يديه لمين ؟
المهم حصلت عليه من نفس الأمين لما دخلت لرئيس الجوازات ألي قالي "لو طلع الباسبور التاني كانت هتبقى جنحة وفيها سجن"، بعدها روحت جوازات مصر الجديدة وقالي أعد أستني أسألك عليه بالتليفون في العاشر من رمضان !! وبعد ساعة ونص وأنا منتظر قالي طيب لو وراك مشوار روحو وتعالي بعدين، والحمد لله أداني تليفونو عشان أسأل، وحوالي الساعة 1:30 قالي أنو لقاه في العاشر وبالفعل بعت يجيبه وهيوصل على الأثنين.
طبعاً الجواز ده أنا قدمت عليه في مايو 2005 لما كنت هسافر الكويت، والموظف وقفلي الدنيا وقالي لازم تجيب كذا وكذا وكذا وأضطريت أني ألغي السفر، ومن الواضح أن البسبور كمل وأتعمل وحسبي الله ونعم الوكيل في ألي وقفلي سفري وهو كان البسبور ينفع يتعمل.
على فكرة البسبور بتاع 2005 ده أنا مكنش عندي موقف من الجيش ولا دفعت فلوسو ولا دفعت الـ 400 جنية التأمين.
تحديث (27 أكتوبر) : قالولي فوت علينا بكرة
تحديث (28 أكتوبر) : لما فوت عليهم بكرة قالولي فوت علينا بكرة
غرييبة يا دنيا .. أنا والله لو منك وحصلي الموقف ده والله كنت قلت ستين داهية في السفر
, أنا بكره جدا جدا اللف في المصالح الحكومية دي وبكره جدا الإنتظار , فربنا يعينك يارب 
وبإذن الله ترجع لنا من السجن بألف ألف سلامة .. بس خد اللاب توب معاك هناك وخط إتصالات
لا مهو أنت مش واخد بالك
كل تعقيد بيخنقني من العيشة فيها أكثر
فبقيت حاسس أنهم صدني عشان مرجعهاش تاني
عمار يا مصر ربنا يخرجنا منك بالسلامه وتعيشى تخنقى فى اهلك وناسك وشبابك هى دى مصر ام الدنيا وهتفضل ام الدنيا بس ام من غير حنان ولازم نخرج منها علشان منولعهاش ويفضل ابو الهول ونعرف لما نرجعها نروح نركب خيل يلا بقى بخاطرها ربنا معاك يا حازم وتخرج منها انشاء الله بألف سلامه وتدعلنا نخرج منها بسلامه احنا كمان متنساش بقى تضيف بقيت العائلة على الباسبورت علشان تشترى دماغك وتبقى لفه واحده
مرحبا
الله يعينك اخوي حازم
اعتقد ان معظم النظام المصري لم يتم تحديثه منذ أن وضع لذلك هناك اجراءات معقده لأبسط الامور .
النظام السعودي لمعظم الوزرات هو نفسه النظام المصري ( وانا اقول التعقيد جاي منين
) . لكن في الاعوام الاخيرة حدثت لدينا طفرة في الحكومة الالكترونية فتم تحديث وتبسيط الاجراءات خصوصا بما يتعلق بالجوزات ونظام الاقامة لغير السعوديين فيمكن انهاء اغلب المعاملات الكترونيا دون الحضور في المقر .
على العموم أهلا بك اخي حازم في بيتك الثاني
وننتظرك لنقوم بواجب الضيافة
فوت علينا بكرة
اية يا حزوم دا انا عملت الباسبور فى يومين
يومين بالظبط بس من غير وسايط
بس انا عملتة برضة فى 2005
وانت عارف ان مصر بتحب والدها ومش بتحبهم يطلعوا برة البلد نفسها كل ولادها يتمتعوا بخيرها
على اساس اننا بنتبطر على النعمة يعنى
والله يا محمود أنا روحت في 2005 عشان أعمل البسبور وطلعتلي القطط الفاطسة
ساعتها أتخنقت، كنت مسافر كويت هب، وبعدها قولت خلاص أديني قاعد أكيد ربنا رايدلي هنا خير
أكتشف بعدها أن البسبور كان طالع بصلاحية سفر خلال 7 شهور وعودة قبل سنة 7 شهور
يعني كان كافي أخلص عقدي ألي بسنة وأرجع أجوز وأخلص جيشي وأسافر تاني
الحمد لله أهو أخيراً البسبور الجديد طلع وجاري عمل التأشيرة